Nu ecchiu forte, tuestu e caminante
 è statu ti la Barca lu comandante.
 A ‘ngiru pi lu munnu si nn’è sciutu,
 ti l’Asia e ti l’America è sciubbinutu.

 “Nc’è lu Signore a ‘ngiru e bbole istu:
 apriti li porte, apritile a Cristu,
 Senza paura e senza proccupazione!”
 Scìa ticennu a tutta la popolazione.

 Cantavane canzuni e faciane frantieddru
 cu facune la festa allu nonnu icchiarieddru.
 Fuciane tutti quanti: ranni, minzani e piccicchi
 e a casa si ni scìane ti carità cchiù ricchi.

 E quannu poi ti tìa nnu carizzu
 ti sintivi tuttu quantu nnu trimulizzu: 
cu la manu ca cchiùi ferma nno si stìa
 e dra uce ca ormai cchiùi no si capìa.

Quanti pariti a ‘nterra, poi, è minati
 senza zappuni e senza carrarmati,
 ma sulu cu la calma e cu l’amore,
 comu n’è ddittu sempre lu Signore.

 No ‘ncete cchiùi lu nonnu ti lu munnu
 e no ‘ngira cchiùi lu Papa turnu turnu:
 “Mi ni sta bbau – è ddittu – e lu sapìti
 e quiddru c’aggiu fattu cu faciti!”.

Di Nicola Gennachi