Quannu lu sule minte lu pete sua
subbra na curta scala fatta ti sita (°)
dra palla ti fuecu ca tae a nui la vita
sparpaja li pinsieri mia e li tua

e quannu lu sule poi si bba marita
e si cala intra’allu mare… senza cu rrita,
tuttu lu celu , tuttu ti fuecu pare
e lassa le gente, la spiaggia cu tuttu lu mare,

intr’allu mare lu sule si sta mmuccia
tranquillu ca la sciurnata è passata
la fica uttata pi osce è maturata
l’aulia è ngrussata pi la puccia.

Ma dru cristianu ca a tie t’è vuardatu,
ssittatu sulla spiaggia e preoccupatu,
sicuru ca puru tiè pueti sapire
pirce’ lu core ni chiange all’imbrunire

èssune li secreti ti lu core
e si mmescane li lacrime e lu tolore
lu mare chianse tantu e lu mmuddrau
e lu sule scusu a mare lacrimau.

Lu mare, lu sule e dr’omu puirieddru
si ttruara ssittati ti paru a n’ancutieddru
li pene canuscíane ti dru signore
ca spetta e chiama lu fiju a tutte l’ore.

(°) scala ti sita: scala di seta su cui si scivola come scivola la seta a dosso.

Lu mare ntorna tuttu lu mmuddrau
ma lu sule mprima mprima lu ssucau
lu core ni scarfau a dru cristianu
e subitu lu nturnisciau chianu chianu

St’affettu sanu sanu nno canuscia,
puru ca la vita mia si ni sta scia,
mo pozzu puru scire cu bba bbisciu
dru fiju mia a ddonca è statu stisu

Chianse ntorna lu sule cu lu mare
e non sapiane cchiui c’è bberane fare
cu spicciane tutti e ddoi ti chiangíre
E cu ddanu pace a dr’omu pi l’avvenire.

Ma lu destinu nui nno canuscimu
e sule e mare sulamente itimu
ma lu Signore Santu e riccu d’amore
“ieni cu mi, tisse, o gran signore”

Li pene tua ormai tie la patute
nè feste nè uttisciane poi t’ha cutute
mintìmu fine a quista sofferenza
e sapiti ca lu Signore a bbui pensa

puru ca ui a mie nno mi pinsati,
lu sacciu ca nno situ maleducati,
ma almenu a mente ui cu tiniti
e quarche frate nuesciu cu bbititi.

Ziù Roccu